கனடாவின் டம்ப்ளர் ரிட்ஜ் பகுதியில் உள்ள ஒரு உயர்நிலைப் பாடசாலையில் நேற்று மதியம் நடந்த கோரமான துப்பாக்கிச் சூட்டில், தாக்குதல் நடத்தியவர் உட்பட சுமார் 10 பேர் உயிரிழந்திருக்கலாம் என அஞ்சப்படுகிறது. இந்தத் துயரச் சம்பவத்தில் 25-க்கும் மேற்பட்டோர் காயமடைந்துள்ளதாக சர்வதேச செய்திகள் தெரிவிக்கின்றன.
மர்ம நபர் ஒருவர் திடீரென பாடசாலைக்குள் புகுந்து அங்கிருந்தவர்கள் மீது சரமாரியாகத் துப்பாக்கிச் சூடு நடத்தியதால் அந்த இடமே போர்க்களமாக மாறியது. இதனைத் தொடர்ந்து, அந்தப் பகுதியில் உடனடியாக அவசரகால எச்சரிக்கை விடுக்கப்பட்டது. மாணவர்கள் மற்றும் பொதுமக்கள் அனைவரும் பாதுகாப்பான இடங்களுக்குச் செல்லுமாறு பொலிஸார் அறிவுறுத்தினர்.
தாக்குதலில் ஈடுபட்ட நபர் பழுப்பு நிற முடி கொண்டவர் என்றும், அவர் அணிந்திருந்த உடைகள் குறித்தும் நேரில் பார்த்தவர்கள் விவரித்துள்ளனர். இதற்கிடையில், சந்தேக நபர் துப்பாக்கிக் காயங்களுடன் சடலமாக மீட்கப்பட்டதை பொலிஸார் உறுதி செய்துள்ளனர். அவர் தன்னைத்தானே சுட்டுத் தற்கொலை செய்திருக்கலாம் எனத் தெரிகிறது.
இந்த அதிர்ச்சி விலகும் முன்னரே, பாடசாலைக்கு அருகில் உள்ள ஒரு வீட்டின் உள்ளும் மற்றொரு வன்முறைச் சம்பவம் நடந்துள்ளது. அங்கிருந்து இரண்டு சடலங்கள் கண்டெடுக்கப்பட்டுள்ளன. இதுவும் பாடசாலைத் தாக்குதலுடன் தொடர்புடையதாக இருக்கலாம் என சந்தேகிக்கப்படுகிறது.
காயமடைந்தவர்கள் அனைவரும் ஹெலிகொப்டர் மற்றும் ஆம்புலன்ஸ் மூலம் விரைவாக மருத்துவமனைகளுக்குக் கொண்டு செல்லப்பட்டு தீவிர சிகிச்சையில் உள்ளனர். அமைதியான கனடா நாட்டில் நடந்த இந்தத் துயரச் சம்பவம் நாடு முழுவதும் பெரும் அதிர்வலைகளையும் சோகத்தையும் ஏற்படுத்தியுள்ளது.
_____________________________________________________________________________________________
A tragic mass shooting occurred at Tumbler Ridge Secondary School in British Columbia, Canada, resulting in approximately 10 deaths and over 25 injuries. The suspect was found dead at the scene, likely from a self-inflicted gunshot wound, and a related incident was discovered at a nearby home. Emergency services responded quickly, and the event has caused widespread shock across the country.
