தூத்துக்குடி மாவட்டம் திருச்செந்தூர் ராமசாமிபுரம் பகுதியைச் சேர்ந்த இளைஞர் ஒருவர், தஞ்சாவூரைச் சேர்ந்த ஆதரவற்ற பெண் என்று தன்னை அறிமுகப்படுத்திக் கொண்ட ஒரு பெண்ணை திருமணம் செய்துள்ளார். திருமணத்திற்குப் பிறகு, தான் புதிதாகக் கட்டிய வீட்டிற்கு ஆசையாக மனைவியை அழைத்து வந்துள்ளார்.
ஆனால், அந்த மகிழ்ச்சி இரண்டு நாட்கள் கூட நீடிக்கவில்லை. கணவர் வெளியே சென்றுவிட்டு வீட்டுக்குத் தேவையான பொருட்களை வாங்கிக்கொண்டு வந்து பார்த்தபோது, அவருக்குப் பெரும் அதிர்ச்சி காத்திருந்தது. வீட்டில் இருந்த பணத்தையும், புதிதாக வாங்கிய துணிமணிகளையும் காணவில்லை.
அப்போதுதான் அந்தப் பெண் தான் கட்டியிருந்த தாலி, வீட்டில் வைத்திருந்த பணம் மற்றும் உடமைகளுடன் தப்பியோடியது தெரியவந்தது. மேலும், அந்த இளைஞர் தனது செல்போனில் வைத்திருந்த திருமணப் புகைப்படங்கள் மற்றும் வீடியோக்களையும் அவர் திட்டமிட்டு அழித்துள்ளார்.
தன்னை ஏமாற்றிவிட்டு ஓடிய பெண் குறித்து அந்த இளைஞர் திருச்செந்தூர் தாலுகா காவல் நிலையத்தில் புகார் அளித்துள்ளார். இந்தப் புகாரின் அடிப்படையில் காவல்துறையினர் வழக்குப் பதிவு செய்து, தலைமறைவான பெண்ணைத் தீவிரமாகத் தேடி வருகின்றனர்.
________________________________________________________________________________________
A newlywed woman in Thiruchendur reportedly fled with her gold wedding chain and cash just two days after her marriage to a local man. The groom discovered the theft after returning home to find his wife missing along with valuables, and he also noted that she had deleted their wedding photos and videos from his phone before escaping.
