கண்டியில் உள்ள ஒரு முக்கிய மகளிர் பாடசாலையில் 9 வயது சிறுமி ஒருவர் மர்ம நபரால் பாலியல் துன்புறுத்தலுக்கு உள்ளான சம்பவம் அப்பகுதியில் பெரும் பரபரப்பை ஏற்படுத்தியுள்ளது. பாதிக்கப்பட்ட சிறுமி இது குறித்து தனது பெற்றோரிடம் தெரிவித்ததை அடுத்து, அவர்கள் உடனடியாகக் கண்டி பொலிஸ் நிலையத்தில் முறைப்பாடு செய்துள்ளனர். தற்போது அந்த மாணவி மேலதிக பரிசோதனைகளுக்காகப் பேராதனை போதனா மருத்துவமனையில் அனுமதிக்கப்பட்டுள்ளார்.
இச்சம்பவம் குறித்து பொலிஸார் மேற்கொண்ட முதற்கட்ட விசாரணையில், பாடசாலையின் சிசிடிவி காட்சிகளின்படி வெளிநபர் ஒருவர் அத்துமீறி உள்ளே நுழைந்தது உறுதி செய்யப்பட்டுள்ளது. எனினும், அவர் எந்த வழியாகப் பாடசாலைக்குள் வந்தார் என்பது குறித்து பொலிஸார் தீவிரமாக ஆராய்ந்து வருகின்றனர். முறையான மருத்துவ அறிக்கை கிடைத்தவுடன் அடுத்தகட்ட சட்ட நடவடிக்கைகள் எடுக்கப்படும் என பொலிஸார் தெரிவித்துள்ளனர்.
பாதுகாப்புப் பணியில் நீண்டகால அனுபவம் வாய்ந்த பாதுகாவலர்களை நீக்கிவிட்டு, புதியவர்களை நியமித்ததே இத்தகைய பாதுகாப்பின்மைக்குக் காரணம் எனப் பெற்றோர்கள் குற்றம்சாட்டுகின்றனர். பாடசாலை நிர்வாகத்தின் இத்தகைய மெத்தனப் போக்கினால் மாணவிகளின் பாதுகாப்பு கேள்விக்குறியாகியுள்ளதாக அவர்கள் விசனம் தெரிவித்துள்ளனர். பாடசாலை வளாகத்திற்குள் வெளியாட்கள் நுழைவதைத் தடுக்கக் கடுமையான பாதுகாப்பு நடைமுறைகள் அவசியம் என்பதை இச்சம்பவம் உணர்த்தியுள்ளது.
_________________________________________________________________________________________________________________________________
A 9-year-old girl at a leading girls’ school in Kandy was reportedly harassed by an outsider who trespassed into the school premises. Police are investigating CCTV footage following a complaint by the parents, while the victim has been hospitalized for medical examination; meanwhile, parents have raised concerns over the school’s compromised security following recent changes in the security staff.
