அமெரிக்கா மற்றும் ஈரான் இடையிலான உடன்படிக்கையைத் தொடர்ந்து உலக சந்தையில் மசகு எண்ணெய் விலை வீழ்ச்சியடைந்து வரும் நிலையில், உள்நாட்டிலும் மக்களுக்கு நிவாரணம் வழங்கக்கூடிய முதல் சந்தர்ப்பத்திலேயே எரிபொருள் விலை குறைப்புக்கான பலன் வழங்கப்படும் என்று அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்தார்.
ஆனாலும், உலக சந்தையில் இப்போது நிலவி வரும் ஒருவித நிலையற்ற தன்மை காரணமாக, விலை குறைக்கப்படும் சரியான காலகட்டத்தை இந்த நேரத்தில் உறுதியாகச் சொல்ல முடியாது என்றும் அவர் சுட்டிக்காட்டியுள்ளார்.
அரசாங்கத் தகவல் திணைக்களத்தில் நேற்று செவ்வாய்க்கிழமை நடந்த, அமைச்சரவை முடிவுகளை வெளியிடும் வாராந்த ஊடகவியலாளர் சந்திப்பின் போதே அவர் இந்தத் தகவலைப் பகிர்ந்துகொண்டார்.
இது தொடர்பாக அவர் தொடர்ந்து பேசுகையில்,
“உலகச் சந்தையில் ஏற்படும் நல்ல மாற்றங்களின் பலன்களை எவ்வித தாமதமுமின்றி நேரடியாகவே மக்களுக்குக் கொண்டு போய்ச் சேர்ப்பதுதான் தற்போதைய அரசாங்கத்தின் மிக முக்கிய குறிக்கோளாகும்.
நாட்டின் பொருளாதார நடவடிக்கைகளை எந்தவொரு முடக்கமும் இல்லாமல் மிகச் சீராக முன்னெடுத்துச் செல்ல வேண்டுமானால், மக்களுக்கு இந்த எரிபொருள் விலை குறைப்பு நிவாரணங்களை வழங்குவது மிகவும் இன்றியமையாதது.
உண்மையில், அமெரிக்காவுக்கும் ஈரானுக்கும் இடையில் இன்னும் இறுதியான உடன்பாடு எதுவும் எட்டப்படவில்லை. அங்கு ஒருவிதமான நிச்சயமற்ற சூழலே நீடித்து வருகின்றது.
இருந்தாலும், இரு நாடுகளும் இந்த உடன்படிக்கையில் கையெழுத்திடும் பணிகள் வரும் வெள்ளிக்கிழமைக்குள் அதிகாரபூர்வமாக நிறைவடையும் என்று எதிர்பார்க்கப்படுகின்றது.
எதிர்வரும் வெள்ளிக்கிழமை இந்த ஒப்பந்தம் கையெழுத்தான பின்னர், உலகப் பொருளாதார நிலைமை சாதகமான ஒரு திசையை நோக்கி மாறும் என்று நம்ப இடமுண்டு.
அப்படி ஏற்படும் சாதகமான சூழ்நிலையின் நல்ல பலன்கள் எமது நாடு போன்ற நாடுகளுக்கும் கிடைக்கும் பட்சத்தில், அதன் நன்மைகளை நிச்சயமாக மக்களுக்குக் கொண்டு சேர்ப்போம். இந்த மாதத்திற்காக முன்பதிவு செய்யப்பட்ட எரிபொருள் கப்பல்கள் அனைத்தும் ஏற்கனவே இலங்கைக்கு வந்து சேர்ந்துவிட்டன. இன்னும் ஒரேயொரு மசகு எண்ணெய் கப்பல் மட்டும்தான் வர வேண்டியுள்ளது.
இப்போது கூட, திறைசேரியிலிருந்து கணிசமான தொகையை மானியமாக வழங்கித்தான் தற்போதைய எரிபொருள் விலையை இந்த மட்டத்திலேயே எம்மால் தக்கவைக்க முடிந்திருக்கிறது.
கடந்த ஏப்ரல் மாதம் வரை செயல்படுத்தப்பட்ட முதற்கட்ட எரிபொருள் மானியத் திட்டத்திற்காக 100 பில்லியன் ரூபா ஒதுக்கப்பட்டிருந்தது. இந்த ஜூன் மாதத்துடன் அந்த மானியக் காலமும் முடிவுக்கு வருகின்றது.
தற்போது ஜூன் மாதத்தின் நடுப்பகுதி என்பதால் உலகச் சந்தையின் மாற்றங்களை நாம் உன்னிப்பாகக் கவனிக்க வேண்டியுள்ளது. எனவே, தற்போதே அவசரப்பட்டு முடிவுகளை எடுத்துவிட்டு, மாத இறுதியில் என்ன நடக்கும் என்று சொல்வது சரியாக இருக்காது” என அவர் குறிப்பிட்டுள்ளார்.
Cabinet Spokesman Minister Nalinda Jayatissa announced that the government aims to pass on the benefits of falling global crude oil prices—driven by the anticipated US-Iran agreement—to the public at the earliest opportunity. While a final pact is expected by Friday, current market volatility makes it difficult to commit to a specific timeframe for local price cuts. He noted that the government is currently heavily subsidizing domestic fuel rates and will closely monitor global market trends for the rest of the month before making any official adjustments to ensure economic stability.
