இந்திய கிரிக்கெட் அணியின் முன்னாள் வீரரும், அணியின் முன்னாள் பேட்டிங் பயிற்சியாளருமான சஞ்சய் பங்கரின் மகன் ஆர்யன் பங்கர், அனயா பங்கர் என்ற பெயரில் திருநங்கை பெண்ணாக மகளிர் கிரிக்கெட்டில் களமிறங்க புதிய வழியைத் தேடியிருக்கிறார்.
மகளிர் கிரிக்கெட்டில் விளையாடுவதற்காக இந்திய கிரிக்கெட் கட்டுப்பாட்டு வாரியத்திடம் (BCCI) அனுமதி கேட்டிருந்தார், ஆனால் அங்கிருந்து எந்த பதிலும் வராததால் அவுஸ்திரேலிய கிரிக்கெட் அமைப்பை அவர் நாடியுள்ளார்.
இதனைத் தொடர்ந்து, அவுஸ்திரேலியாவில் நடக்கவுள்ள உள்ளூர் மகளிர் கிரிக்கெட் போட்டிகளில் கலந்துகொள்ள அனயாவுக்கு அனுமதி கிடைத்துள்ளது.
2001 முதல் 2004ஆம் ஆண்டு வரை இந்திய அணிக்காக விளையாடிய சஞ்சய் பங்கரின் மகனான ஆர்யன், உள்ளூர் கிரிக்கெட்டில் மும்பை மற்றும் புதுச்சேரி அணிகளுக்காக விளையாடிய அனுபவம் கொண்டவர்.
கடந்த 2023ஆம் ஆண்டில் தான் பெண்ணாக மாறப்போவதாக வெளிப்படையாக அறிவித்த அவர், அதற்காகத் தேவையான ஹார்மோன் சிகிச்சைகளைத் தொடங்கினார். தொடர்ந்து பாலின மாற்ற சிகிச்சைகளை முடித்துவிட்டு, தனது பெயரையும் அனயா பங்கர் என்று அதிகாரப்பூர்வமாக மாற்றிக்கொண்டார்.
இதன் காரணமாக, மகளிர் கிரிக்கெட் பிரிவில் தனது விளையாட்டுப் பயணத்தைத் தொடர்வதற்கான முயற்சிகளில் தொடர்ந்து ஈடுபட்டு வருகிறார்.
அவுஸ்திரேலியாவின் பிரீமியர் மகளிர் கிரிக்கெட் போட்டிகளில் விளையாட அனயா தனது விருப்பத்தைத் தெரிவித்திருந்தார்.
இதற்கான முறையான அனுமதியை அவுஸ்திரேலிய கிரிக்கெட் அமைப்பு தற்போது வழங்கிவிட்டது. எனினும், சர்வதேச கிரிக்கெட்டில் விளையாடும் தகுதி பற்றி பேசும்போது சர்வதேச கிரிக்கெட் கவுன்சிலின் (ICC) கட்டுப்பாடுகள் தொடர்ந்து நடைமுறையில் இருக்கும்.
ஆண் பருவமடைதலைக் கடந்த திருநங்கை பெண்கள், உயர்மட்ட மகளிர் சர்வதேச போட்டிகளில் பங்கேற்பதைத் தடை செய்யும் விதிகளை ஐசிசி 2023ஆம் ஆண்டில் கொண்டு வந்தது.
ஐசிசி விதிகளின்படி, உயர்மட்ட மகளிர் கிரிக்கெட்டில் விளையாடத் தகுதி பெற வேண்டுமானால், வீராங்கனையின் இரத்தத்தில் உள்ள டெஸ்டோஸ்டிரோன் அளவு குறைந்த பட்சம் 12 மாத காலத்திற்கு 10 nmol/L அளவுக்குக் குறைவாக இருக்க வேண்டும்.
அனயாவின் உயர்மட்ட கிரிக்கெட் தகுதி குறித்த இறுதி முடிவு, அவரது டெஸ்டோஸ்டிரோன் பரிசோதனை முடிவுகளைப் பொறுத்தே நிர்ணயிக்கப்படும். இதுபற்றி கிரிக்கெட் அவுஸ்திரேலியாவின் நேர்மை பிரிவுத் தலைவர் ஜாக்கி பார்ட்ரிட்ஜ் பேசுகையில், 2027 மார்ச் மாதத்திற்குப் பிறகு செய்யப்படும் டெஸ்டோஸ்டிரோன் பரிசோதனை முடிவுகளின் அடிப்படையில் மட்டுமே அனயாவின் உயர்மட்ட கிரிக்கெட் தகுதி முடிவு செய்யப்படும் எனக் கூறியுள்ளார்.
அதேவேளையில், வரும் 2027 மார்ச் மாதம் வரையிலும் அவுஸ்திரேலியாவின் மாநிலங்கள் மற்றும் பிராந்தியங்களில் நடைபெறும் பிரீமியர் கிரிக்கெட் போட்டிகளில் அனயா தொடர்ந்து விளையாட முழுத் தகுதியைப் பெற்றுள்ளார்.
இதன் மூலம், முன்பு இந்திய உள்ளூர் கிரிக்கெட்டில் விளையாடிய ஆர்யன் பங்கர், இப்போது அனயா பங்கர் என்ற புதிய அடையாளத்துடன் மகளிர் கிரிக்கெட் உலகில் தனது அடுத்த வெற்றிகரமான அத்தியாயத்தைத் தொடங்கியுள்ளார்.
Former Indian cricketer Sanjay Bangar’s child, formerly known as Aryan and now as transgender woman Anaya Bangar, has been cleared by Cricket Australia to play in local women’s premier matches, while eligibility for elite international matches will depend on future testosterone testing in line with ICC regulations.
