பிரேசிலின் ரியோ டி ஜெனிரோ நகரின் வான்பரப்பில் இரண்டு விமானங்கள் ஒன்றுடன் ஒன்று மோதி கோர விபத்துக்குள்ளாகியுள்ளன. இந்த விபத்தில் இரண்டு விமானங்களிலும் பயணம் செய்த 6 பேரும் பரிதாபமாக உயிரிழந்துள்ளதாகத் தகவல்கள் வெளியாகியுள்ளன.
நகரத்தின் மேற்குப் பகுதியில் உள்ள ‘ரெக்ரியோ டோஸ் பான்டெய்ரான்டெஸ்’ என்ற புறநகர்ப் பகுதிக்கு மேலேயே இந்த அதிர்ச்சித் தரும் சம்பவம் அரங்கேறியுள்ளது.
இந்த கோர விபத்து எப்படி நடந்தது என்பது குறித்து அதிகாரிகள் தீவிரமான அதிகாரப்பூர்வ விசாரணைகளைத் தொடங்கியுள்ளனர்.
நடுவானில் மோதிக்கொண்ட இரண்டு விமானங்களும், அங்கிருந்த ஒரு மின்சார கார் விற்பனை நிலையத்தின் வாகன நிறுத்தத்தில் விழுந்து சுக்குநூறாக நொறுங்கியுள்ளன.
இதனால், அங்கு நிறுத்தி வைக்கப்பட்டிருந்த சுமார் 20 மின்சார வாகனங்கள் (EVs) திடீரென தீப்பற்றி எரியத் தொடங்கியதாக தீயணைப்புத் துறையினர் தெரிவித்துள்ளனர்.
மின்சார வாகனங்களில் பயன்படுத்தப்படும் லித்தியம்-அயன் பேட்டரிகள் காரணமாக, பரவிய தீயைக் கட்டுப்படுத்துவது தங்களுக்குப் பெரும் சவாலாக இருந்தது என்று தீயணைப்புப் படையின் ஊடகப்பேச்சாளர் பேபியோ கொன்ட்ரெய்ராஸ் விவரித்துள்ளார்.
இது குறித்து அவர் மேலும் விவரிக்கையில்,
“லித்தியம்-அயன் பேட்டரிகள் தீப்பற்றும்போது, அவை மிக அபாயகரமான நச்சு வாயுக்களை வெளியேற்றுவதுடன், தீயின் தீவிரத்தையும் வெப்பத்தையும் பன்மடங்கு அதிகரிக்கச் செய்கின்றன.
சாதாரண எரிபொருள் கார் ஒன்றில் ஏற்படும் தீயை அணைப்பதை விட, இதுபோன்ற மின்சார வாகனம் ஒன்றில் ஏற்படும் தீயைக் கட்டுப்படுத்த 3 முதல் 4 மடங்கு அதிகத் தண்ணீர் தேவைப்படும்” என்று அவர் குறிப்பிட்டுள்ளார்.
விபத்து நிகழ்ந்த இடம் மக்கள் நடமாட்டம் அதிகம் உள்ள ஒரு பகுதியாகும். நல்லவேளையாக, விமானங்கள் இந்த வாகன நிறுத்தத்தில் விழுந்தன; ஒருவேளை இவை குடியிருப்புப் பகுதிக்குள் விழுந்திருந்தால், உயிரிழப்புகள் மற்றும் பாதிப்புகளின் எண்ணிக்கை இன்னும் மோசமாக இருந்திருக்கும் என்றும் ஊடகப்பேச்சாளர் கவலை தெரிவித்துள்ளார்.
தீப்பற்றி எரிந்த மின்சார கார்களுக்கு நடுவே நொறுங்கிக் கிடந்த ஒரு விமானத்தில் இருந்து 5 பேரின் உடல்களையும், அங்கிருந்து சுமார் 100 மீட்டர் தொலைவில் விழுந்து கிடந்த மற்றொரு விமானத்தில் இருந்து அதன் பைலட்டின் உடலையும் மீட்புக் குழுவினர் மீட்டுள்ளனர்.
இதற்கிடையில், விமானங்கள் மோதிய வேகத்தில் அவற்றின் பாகங்கள் விபத்து நடந்த இடத்தைச் சுற்றி பல நூறு மீட்டர் தூரத்திற்குச் சிதறிப் போய்க் கிடந்ததாக அல்ஜசீரா செய்தி நிறுவனம் செய்தி வெளியிட்டுள்ளது.
Two airplanes collided mid-air over Rio de Janeiro, Brazil, resulting in the tragic deaths of all six people on board. The planes crashed into the parking lot of an electric vehicle dealership, triggering an intense fire that engulfed about 20 electric cars. Firefighters faced significant challenges in extinguishing the blaze due to the lithium-ion batteries, which required massive amounts of water and released toxic gases. Authorities have launched an investigation into the cause of the accident, noting that casualties could have been much higher if the aircraft had crashed into the nearby densely populated residential area.
