தென்னிந்தியத் திரையுலகின் மூத்த பழம்பெரும் நடிகையான சௌகார் ஜானகி (94), உடல்நலக்குறைவு காரணமாகச் சென்னையில் உள்ள தனியார் மருத்துவமனை ஒன்றில் அனுமதிக்கப்பட்டுள்ளார்.
சினிமா உலகில் பல தசாப்தங்களைக் கடந்து ரசிகர்களின் நெஞ்சங்களில் நீங்கா இடம் பிடித்த மூத்த நடிகை சௌகார் ஜானகிக்கு இப்போது வயது 94. திடீரென ஏற்பட்ட உடல்நலக் குறைவு காரணமாக அவர் சென்னையில் உள்ள ஒரு தனியார் மருத்துவமனையில் அனுமதிக்கப்பட்டுள்ளார்.
தற்போது அவருக்கு மருத்துவர்கள் தீவிர சிகிச்சைப் பிரிவில் (ICU) வைத்துத் தொடர்ந்து உரிய சிகிச்சைகளை வழங்கி வருகின்றனர்.
கன்னடக் குடும்பத்தில் 1931 ஆம் ஆண்டு டிசம்பர் 12 இல் பிறந்த இவர், தமிழ், தெலுங்கு, கன்னடம், மலையாளம் எனப் பல மொழிப் படங்களில் நடித்துள்ளார். மொத்தம் 450-க்கும் அதிகமான திரைப்படங்கள் மற்றும் 300 மேடை நாடகங்களில் நடித்து தன் திறமையை நிரூபித்துள்ளார்.
இயக்குநர் எல்.வி. பிரசாத்தின் ‘ஷவுகாரு’ தெலுங்குப் படம் மூலம் சினிமா உலகிற்குள் நுழைந்தார். அந்தப் படம் சூப்பர் ஹிட் அடிக்கவே, இவரது பெயருடன் ‘சௌகார்’ என்ற அடைமொழியும் நிலையாக ஒட்டிக்கொண்டது. அதன் பிறகு 1952-இல் வெளியான ‘வளையாபதி’ படத்தின் மூலம் தமிழ் சினிமாவிலும் தடம் பதித்தார்.
கன்னட சூப்பர் ஸ்டார் டாக்டர் ராஜ்குமாருடன் சேர்ந்து, 1959-இல் வெளிவந்த இந்தியாவின் முதல் ‘பேன்-இந்தியா’ படமான ‘மகிஷாசுர மர்தினி’யில் நடித்த பெருமை இவருக்கு உண்டு. இதன்மூலம் இந்தியாவின் ஆரம்பகால பேன்-இந்தியா நடிகைகளில் ஒருவராகவும் இவர் கொண்டாடப்படுகிறார்.
கலைத்துறைக்கு இவர் செய்த சேவையைப் பாராட்டி, இந்திய அரசு இவருக்கு நாட்டின் உயரிய ‘பத்மஸ்ரீ’ விருதை வழங்கி கவுரவித்துள்ளது. மேலும், கலைமாமணி மற்றும் நந்தி விருதுகளையும் பெற்றுள்ளார். இவரது சகோதரி கிருஷ்ணகுமாரியும் திரையுலகில் பிரபல நடிகையாக வலம் வந்தவர் என்பது குறிப்பிடத்தக்கது.
Veteran South Indian actress Sowcar Janaki, aged 94, has been admitted to a private hospital in Chennai and is receiving intensive care treatment following a sudden illness.
